Stefnumótun í skólastarfi Kópavogs
Leikskólanefnd Kópavogsbæjar hefur mótað sér stefnu varðandi málefni leikskólans. Hér er hlekkur inn á heimasíðu Kópavogsbæjar þar sem finna má allar stefnur fyrir leikskóla Kópavogs. Þar er hægt að nálgast nánari upplýsingar um eftirfarandi stefnur:
- Jafnréttisstefna
- Eineltisstefna
- Lýðheilsustefna Kópavogs
- Stefna í sérkennslu
- Umhverfisstefna
- Læsisstefna
Jafnréttisstefna Álfatúns
Matarstefna Álfatúns
Áherslur í fæðuvali og matseld í leikskólanum Álfatúni
Matartímar og borðhald hafa mikið uppeldislegt gildi og mikil áhersla er lögð á það að börnin í Álfatúni fái hollan og fjölbreyttan mat í leikskólanum. Matartíminn á að vera notalegur tími þar sem öllum líður vel. Þar gefst tækifæri til skemmtilegra og fræðandi umræðna. Starfsfólk matast með börnunum og áhersla er lögð á að börnin læri almenna borðsiði.
Vandað er til hráefniskaupa og matreitt sem mest frá grunni. Nær allt brauð er bakað á staðnum. Notkun unninna matvara er haldið í algjöru lágmarki en ef það er notað þá er þess gætt að hráefnið sé sem hollast og innihaldi sem minnst af aukaefnum. Hýðishrísgrjón eru notuð sem meðlæti og í súpur og grauta. Sykurnotkun er haldið í lágmarki og leitast við að nota sætugjafa úr öðru en hvítum sykri. Til dæmis notum við hrásykur, hunang og rúsínur.
Leitast er við að nota heilhveiti í matargerð í stað hvíts hveitis og er hvítu hveiti og heilhveiti blandað til helminga í bakstur og síðan bætt við öðrum grófari korntegundum og fræjum. Eingöngu er notast við heilhveitipasta og spagettí.
Notkun salts er stillt í hóf þar sem börn eru viðkvæm fyrir saltneyslu og lífrænn grænmetiskraftur er notaður í matargerð. Smjörvi er notaður sem viðbit og íslenskt smjör og olíur eru notaðar í matseld.
Ef barn er með ofnæmi eða mataróþol er reynt að koma til móts við þarfir þess í samráði við foreldra en ávallt þarf að skila inn vottorði frá lækni.
Markmið leikskólans er að nýta allt hráefni það vel að sem minnst fari í lífrænan úrgang.
Til að stuðla að góðu fæði og styðja við starfsmenn eldhúsa var ákveðið hjá Kópavogsbæ að ganga til samninga við Skóla ehf. um kaup á næringarstefnu þeirra ásamt matseðlum og uppskriftabanka.
Matseðlarnir eru unnir af næringarfræðingi og lýðheilsufræðingi Skóla í takt við opinberar ráðleggingar um mataræði og næringarefni. Þar sem mismunandi næringarefni koma úr mismunandi matvælum er lögð áhersla á fjölbreytni í fæðuvali. Í anda lýðheilsustefnu Kópavogs verður lögð áhersla á að allur matur sé unninn frá grunni í eldhúsum leikskólanna sem auðveldar alla vinnu vegna ofnæmisfæðis.